स्वामींचे शब्द खरे ठरले ।
दत्तोबा भोसले ।
रणी उतरले।
चिंचोली कॅम्पचे नेतृत्व |
गौडगाव कॅम्‍प शिस्तबद्ध ‍‍।
रझाकार पुंड केले फस्त |

धानोर्‍यात दरारा केला ।
पैलवान होते संगतीला।
स्वातंत्र्य सैनिकी हल्ला ।
मोठा परिवार पाडीला

समाजवादी विचारसरणी ।
शक्तीची केली पेरणी |
युक्तीची होती फोडणी ।
देशभक्तीची ही धाटणी |

क्रांतिसिंह नाना पाटलांना।
बोलावून मोठ्या सभांना |
मारीन किंवा मरेन ।
हा दत्तोबांचा बाणा |

रझाकारी जुलूम चाले।
चिलवडी गाव जाळले ।
त्याचा सूड घेण्याचे ठरले।
रझाकारी बहू उडवले |

निजाम दुर लोटले।
जनतेचे रक्षण केले ।
चिंचोली कॅम्प मधले ।
पासष्ट गावे मुक्त केले |

पासष्ट गावांचे राज्य ।
नाव मुक्तापूर स्वराज्य !

मराठवाड्यात प्रतीसरकार।
प्रमुख दत्तोबा मातोळकर |

दत्तोबांचे सैनिक भारी ।
जनतेला देई उभारी ।
नेतृत्व सरहद्दीवरी ।
कलेक्टर हैदर वर्णन करी ।

जवळे दुमला येथील कॅम्प।
रझाकारा सुटला कंप ।
निझामा लागली धाप ।
असा क्रांतीचा हा भूकंप |

उपळे गावाचे धन।
व्यापाऱ्यांचे केले रक्षण ।
सोडगे दल केले निर्माण।
क्रांती वीराचे शूर सैन्य ।

काजळा गावचा हल्ला।
मोठ्या शौर्याने परतवीला ।
सेलूच्या हप्त्यावर डल्ला।
म्हणून तुरुंगवास भोगला।

आळणी गावचे केले रक्षण ।
नाईचाकूर लुटले स्टेशन |
हल्ल्याचा सूत्रधार कोण?
बघा ‘ऑक्टोबर कुप ‘ वाचून

चळवळीत पुढे किल्लारी।
खरडा , ईट, घाट पिंपरी |
काटी गाव असे ते भारी ।
धाबे दणाणले सरकारी |

चाल:-
हैदराबाद मुक्तिसंग्राम
केला गतिमान |
सोलापूर जिल्ह्यात आश्रय नीति बुद्धिमान |
देवतळे मध्ये रझाकाराला दावी आस्मान |
गनिमीकाव्याने ठरवून केले जिवाचे रान |

चाल:-
क्रांतिवीर दत्तोबा भोसले।
वीर पोसले ।
काळ भासले |
निजामाची केली सुट्टी।
स्वातंत्र्यसैनिकांशी गट्टी।
गडी हाडाचे मरहट्टी | रं जी

मातोळा गावचा वीर ।
शूर नरवीर |
अति खंबीर |
केला कुळाचा असा उद्धार |
स्वातंत्र्य मिळवण्याचा निर्धार |
दत्तोबा वीर शोभे भरदार | जी

मराठवाड्या मिळाले स्वातंत्र्य ।
जळले पारतंत्र्य |
निझामी षडयंत्र |
करा त्या विरांचा जयजयकार |
स्मरा त्या वीरांचे उपकार |
मुजरा शाहिरांचा त्यांना त्रिवार |